Fjallaskálar Útivistar

Básar á Goðalandi eru höfuðvígi Útivistar og segja má að þar slái hjarta félagsins. Gönguleiðir við allra hæfi er að finna í nágrenninu.

Fimmvörðuskáli stendur á Fimmvörðuhálsi þar sem hann er hæstur, um það bil 600 metra austan við vörðurnar fimm sem hálsinn dregur nafn sitt af. Örstutt frá skálanum eru nýjustu eldstöðvar Íslands, Magni og Móði.

Skálinn við Strút stendur í fallegu dalverpi inn af Mælifellssandi og er ákjósanlegur áningarstaður á milli Álftavatna í austri og Hvanngils eða Emstra í vestri.

Skálinn í Álftavötnum kúrir á gróðursælum bökkum vatnanna, vinalegur og þægilegur skáli án alls íburðar. Þar upplifa gestir einfaldleika hálendisins og kyrrð fjallanna.

Umhverfis skálann í Skælingum eru sérstæðir hraundrangar sem breyta svæðinu í náttúrulegan lystigarð. Skálinn einkennist af fornri íslenskri byggingarhefð með vegghleðslum úr grjóti.

Skálinn við Sveinstind stendur suðaustan við fjallið og er í grunninn gamall gangnamannaskáli. Skaftá rennur rétt hjá skálanum og setur mark sitt á landslagið, sem að miklu leyti er þakið iðjagrænum mosa.

Tindfjallasel er neðsti skálinn af þremur í Tindfjöllum. Hann er í 680 m hæð, afar vel búinn og tilvalið að dveljast þar og njóta útivistarsvæðisins í Tindfjöllum, hvort sem er að sumri eða vetri.